細路

1/ 剛才回家的時候，在地鐵月台搭升降機到大堂。升降機內，有一家三口，那個小女孩，才四五歲，說的語言是

「咦，呢個 lift 好多 people 喎。」

然後，那位媽媽又很自然的說，對呀，好多 people 落車所以咪好多 people 搭 lift 囉。想點呢，遲d 佢地既對話會唔會變成「homework d 題目好 difficult」/ 「呢個干炒牛河好 delicious」咁架！？唉，唔怪得香港細路既語文水平會越來越下降…中英夾雜，對小朋友來說，只會令他們對兩個語言的字彙和結構認識得更少啊。


2/ 今天坐巴士，由坑口到鑽石山，在巴士上睡覺。忽然，後面大力一踢，把我踢醒！好，一次半次，我忍；第二次，都算；第三次呢，妖，一望後面，有兩個男仔o係度玩，玩既，係踢！我！張！櫈！

兩隻野，一個十歲過外，另一個都六七歲。那刻，我怒睥那位年紀較大的細路。佢，好明顯驚左，因為我見到佢即刻叫佢細佬唔好玩，兼夾面都青埋 (我諗我塊面真係黑過鑊燶)。好啦，再訓，沒多久，細佬又再玩過，每隔一兩分鐘就踢張橩一次。今次呢，先睥細佬，再怒睥佢阿媽！個阿媽呢，俾左個好尷尬既表情我，之後，竟然無出聲叫佢個仔唔好踢！頂，激死我。

最後，才發覺，那個阿媽根本搞唔掂兩個仔。大o個件，十歲人仔，竟然鬧阿媽好帶佢搭巴士唔搭地鐵 (仲要鬧左十分鐘)，個細架呢，跟埋個阿哥一份，幫口話「係啦次次出街都係咁！！」(妖，唔好出街啦咁你，我心諗)。

然後呢，個阿媽，竟然低聲下氣咁解釋 ，「係啦，今次試過咪下次唔會囉…」，咁！係咪我同時代脫左節 — 當代的教育方法，係咪無論遇到任何情況，身為父母都唔可以打、唔可以鬧咁架！？之後，阿媽同親戚講電話，又竟然好委屈咁話「係啦搭錯左架車，搞到俾個仔鬧…」。咁多個竟然，都應該足以表達到，我對整個情況感到有多驚奇。唉，有個咁既阿媽，唔怪得有對咁趣緻既兄弟。

到總站 (鑽石山地鐵)，阿哥，一開巴士閘門，立刻飛奔，不知所蹤。難得阿媽又氣定神閒，拖住個細佬，慢慢行。

香港的未來，有呢堆人存在，會變成點？

===

雖然今天我怒睥兩兄弟，之但係平時的我，其實是極喜愛小朋友的 (在我的世界裏，十一歲以下都稱為小朋友)，大部分都很可愛又很聽話 (聰明與否又另一回事啦)。有時在地鐵，又或是在晚飯時分，旁邊有小朋友 (特別是四歲以下那些) 的話，我都會跟他們玩。有時還會是他們做主動來撩我玩的，很得意。